მუზეუმი დადიანთა ორ სასახლეშია განთავსებული და ექსპონატების განსაკუთრებული მრავალფეროვნებით გამოირჩევა. აქ გამოფენილია პალეოლითის, ნეოლითისა და ბრინჯაოს ხანის არქეოლოგიური, ეთნოგრაფიული ნიმუშები, ნუმიზმატიკური მასალა, საბრძოლო იარაღები. აქ იპოვით უძველეს კოლხურ მონეტას- კოლხურ თეთრს.  აქ ინახება მსოფლიო მნიშვნელობის სამუზეუმო ექსპონატები, რელიგიური სიწმინდეები. მუზეუმის ფონდებში 50 000-ზე მეტი ექსპონატია დაცული. ამ უნიკალური მუზეუმის გარშემო, 67 ჰექტარზე, დადიანების მიერ გაშენებული უნიკალური ტყე-პარკი მდებარეობს. აქ ენდემურ ჯიშებთან ერთად მსოფლიოს სხვადასხვა კუთხიდან ჩამოტანილი იშვიათი ჯიშის ხე-მცენარეები ხარობს.